اطلاعات روز: مقام‌های محلی ولایت تخار می‌گویند که پس از درگیری طالبان و مرزبانان تاجیکستان در ولسوالی درقد، مرزبانان تاجیکستان برخی ساحات تحت کنترل طالبان در این ولسوالی را بمباران کرده‌اند.
به گفته‌ی این مقام‌ها، درگیری صبح امروز (دوشنبه، پنجم سنبله) به خاطر قاچاق مواد مخدر صورت گرفته است.
جواد هجری، سخن‌گوی والی تخار به آریانا نیوز گفته که درگیری میان قاچاقبران و نیروهای مرزی تاجیکیستان در بخشی که زیر کنترل طالبان قرار دارد، صورت گرفته و پس از کشته شدن دو مرزبان تاجیک هواپیماهای تاجیکستانی وارد عمل شده و منطقه را بمباران کرده است.
شاهدان در ولسوالی درقد گفته که جنگنده‌ها ساحات تحت حاکمیت طالبان را در روستاهای موسازی، قره‌تپه، واچ‌گذر، رستاقی‌ها و کشمی‌ها بمباران کرده است.
خلیل اسیر، سخن‌گوی فرماندهی پولیس تخار به تلویزیون ۱ گفته که در نتیجه این درگیری، دو تن از مرزبانان تاجیک و ۶ طالب کشته و ۹ طالب دیگر زخمی شده‌اند.
برخی گزارش‌ها حاکی است که در میان کشته شده‌ها دو قاچاقبر مواد مخدر نیز شامل است.
پولیس تخار گفته که در این محل غیرنظامیان حضور ندارند و تنها پایگاه طالبان بوده است.
ولسوالی درقد جزیره‌یی در میانه رودخانه آمو است که در مرز بین افغانستان و تاجیکستان موقعیت دارد. گفته می‌شود که در این ولسوالی مواد مخدر به‌صورت گسترده قاچاق می‌شود.