اطلاعات روز: مقام‌های امنیتی تاجیکستان اعلام کرده‌اند که یک واحد ویژه نظامی شناسایی در مرز افغانستان ایجاد می‌شود.
رجب علی رحمان علی، فرمانده نیروهای مرزی تاجیکستان باابراز نگرانی از وضعیت امنیتی در نقاط مرزی افغانستان گفته است که این واحد نظامی مسئول نظارت و بررسی دقیق، از فعالیت‌های مرزی را به عهده خواهد داشت.
به گفته‌ی این مقام امنیتی تاجیکستان، قرار است حدود ۱۰۰۰ نظامی در چارچوب این واحد فعالیت خود را آغاز کنند. رحمان علی، وضعیت امنیتی در مناطق مرزی میان افغانستان و تاجیکستان را «پیچیده و نگران کننده» خوانده است.
گزارش‌ها از تاجیکستان می‌رسانند که پارلمان و مجلس سنای این کشور طرح ایجاد واحد نظامی ویژه در خطوط مرزی افغانستان– تاجیکستان را تصویب کرده است.
حضور طالبان و دیگر گروه‌های تروریستی در شماری از مناطق ولایت‌های شمالی به ویژه قندوز و بدخشان باعث افزایش ناامنی در این ولایت‌ها شده که مقام‌های تاجیکستانی از نفوذ فعالیت این گروه‌ها در خاک شان نگران اند. اخیراً دولت تاجیکستان به‌دلیل نگرانی‌های امنیتی، قنسولگری‌های خود را در ولایت‌های قندوز و بدخشان را برای مدت نامعلوم بسته کرد.
