مارکو روبیو، وزیر امور خارجه‌ی امریکا، برای گفت‌وگو با مقام‌های کشورهای آسیای مرکزی به اوزبیکستان سفر کرده است.
مارکو روبیو و سعیده میرضیایوا، رییس اداره‌ی ریاست‌جمهوری اوزبیکستان صبح امروز (دوشنبه، ۲۷ میزان) در میدان ریگستان شهر سمرقند با خبرنگاران صحبت کردند.
وزیر خارجه‌ی امریکا گفت که سمرقند قرن‌ها است یکی از گذرگاه‌های مهم تجارت جهانی به شمار می‌رود و نمایندگان نزدیک به ۳۰۰ شرکت امریکایی به این شهر آمده‌اند.
به‌گفته‌ی روبیو، انتظار می‌رود در نتیجه‌ی این سفر توافق‌نامه‌هایی به ارزش میلیاردها دالر امضا شود.
او همچنین گفت که ایالات متحده علاقه‌مند است همکاری‌های تجاری و اقتصادی خود را با اوزبیکستان و دیگر کشورهای آسیای مرکزی بیش از پیش گسترش دهد.
او در سمرقند با وزیران خارجه‌ی اوزبیکستان، قزاقستان، قرقیز، تاجیکستان و ترکمنستان دیدار دوجانبه برگزار کرده است.
روبیو در ایکس پیرامون دیدارش با وزیر خارجه‌ی اوزبیکستان نوشته است که در این دیدار درباره‌ی تعمیق مشارکت استراتژیک ایالات متحده و اوزبیکستان، از جمله همکاری‌هایی در زمینه‌ی زیرساخت‌ها، فضا، مواد معدنی حیاتی و از طریق پلتفرم دیپلماتیک C5+1، بحث کرده است.
او گفته است: «ما با هم در حال کار هستیم تا رفاه هر دو کشورمان و منطقه را پیش ببریم.»
